Արտակարգ սեպտեմբերին ուսումնական պրոցեսը կազմակերպելու ուղեցույց

Առողջապահության

Ուղեցույցի նախագիծ

Ուղեցույցը կազմելու համար ելակետեր.

• թագավարակը Հայաստանի Հանրապետությունում կա և կլինի ամբողջ սեպտեմբերի ընթացքում.
• հնարավոր է ապրել, առանց վարակվելու.
• թագավարակի համար բարենպաստ պայմաններ են փակ, տաք տարածքները, մարդկային կուտակումները.
• յուրաքանչյուրը ելնում է «չեմ վնասի» սկզբունքից.
• սովորող-ծնող-կրթահամալիրի աշխատող եռամիության հիմք են փոխադարձ հարգանքը, վստահությունը, ինքնակազմակերպումը, ինքնակրթությունը:

Անհատական հիգիենա

Առավոտյան տանը չափվում է սովորողի, աշխատողի ջերմաստիճանը: Նորմայից բարձր ջերմաստիճանի, կամ որևէ վարակային հիվանդության ախտանշանի դեպքում սովորողը, աշխատողը մնում տանը, այս մասին սահմանված կարգով տեղեկացնելով:

Աշխատողի ջերմաստիճանը չափվում և գրանցվում է աշխատանքի ներկայանալիս: Սովորողի ջերմաստիճանը օրվա ընթացքում՝ մինչև պարապմունքների վերջը չափվում և գրանցվում է: /Առավոտյան ջերմաչափումը սկսում է առաջին դասարաններից, հերթով ջերմաչափոը փոխանցում են հաջորդ դասարանին: Վերջում 5 տարեկանների խումբը, նախակրթարաններն ունեն իրենց ջերմաչափը, իրենց մուտքը դրսից է և ներս եկողին ջերմաչափում են:/:

Սովորողը, աշխատողը իր մոտ ունենում է անհատական հիգիենայի միջոցներ` դիմակ, ախտահանող հեղուկով սրվակ, թաց և չոր անձեռոցիկ, հաճախակի լվացվում է, ամեն օր թաց անձեռոցիկով սրբում է իր անհատական թվային միջոցը, հեռախոսը, սեղանը: /Այս գործողությունը յուրաքանչյուր սովորող կատարում է յուրաքանչյուր պարապմունքից հետո/:

Տրանսպորտը

Տրանսպորտային միջոցը սովորողներին սպասարկելուց առաջ ախտահանվում է: Տրանսպորտում առկա է ախտահանիչ հեղուկը: Տրանսպորտի վարորդը և տեղափոխման հերթապահը դիմակներով են:

Եթե սովորողը օգտվում է հանրային տրանսպորտից, պահպանում է դրա համար որոշված կանոնները` չի բարձրանում տրանսպորտ, եթե նստելու տեղերը զբաղեցված են, կրում է դիմակ, ունի մանր` ուղեվարձը վճարելու համար:

Եթե քայլելով (իրենց ընտանիքին պատկանող մեքենայով) է գալիս, ճանապարհին ինքն է որոշում դիմակ կրելու հարցը:

Ուսումնական տարածքները

Շենքում գտնվող ուսումնական տարածքները անընդհատ օդափոխվում են: Առկա են լվացարաններ` հնարավորության դեպքում նաև տաք ջրով, օճառ, թղթե սրբիչներ: /Լվացարանները, զուգարանները ախտահանվում են ընդմիջումներից առաջ և հետո/ Սենյակներում, միջանցքներում առկա են ախտահանիչ հեղուկով սրվակներ` անհրաժեշտ քանակությամբ: Կան ծածկվող աղբամաններ: Աղբը, այդ թվում օգտագործված դիմակը, անձեռոցիկը պետք է գցել այդպիսի աղբամանի մեջ:

Բացօթյա ուսումնական տարածքների մոտ գտնվող լաբորատորիաներում, որտեղ դրսից մուտքը դրսից դյուրին է, կան լվացարաններ, աղբարկղեր:

Ուսումնական գործի կազմակերպական ձևերը

Կրթահամալիրում ուսումնական պրոցեսի կազմակերպման ձևերն են.

• առկա ուսումնառություն
• ուսումնառություն ընտանեկան (ինքնակրթության) դպրոցում
• առկա և ընտանեկան դպրոցում ուսումնառությունների համադրում
• հեռավար ուսուցում:

Առկա ուսումնառության դեպքում սովորողը ֆիզիկական միջավայրում, խմբով մասնակցում է իր անհատական ուսումնական պլանով որոշված բոլոր ուսումնական պարապմունքներին:

Ընտանեկան (ինքնակրթության) դպրոցում ուսումնառության դեպքում սովորողին` իր անհատական ուսումնական պլանին համապապասխան, տրամադրվում են ուսումնական նյութերը: Նա մասնակցում է նախօրոք որոշված առցանց պարապմունքների: Ուսումնառության արդյունքի համար պատասխանատվությունը սովորողինն է: Դասավանդողը մեթոդական օգնություն կամ խորհրդատվություն է տրամադրում:

Առկա և ընտանեկան դպրոցում ուսումնառությունների համադրման դեպքում սովորողը ընտրում իր անհատական ուսումնական պլանի այն դասընթացները, որոնց ցանկանում է մասնակցել ֆիզիկական միջավայրում և նրանք, որոնք ցանկանում է յուրացնել ինքնակրթության միջոցով:

Հեռավար ձևով ուսումնառությունը կազմակերպվում է կրթահամալիրում սահմանված կարգով: Սովորողը իր անհատական ուսումնական պլանին համապատասխան ստանում է ուսումնական նյութերը, ինքնուրույն ուսումնասիրում, քննարկում իրեն կցված դասավանդողի հետ: Անհրաժեշտության դեպքում կարող են կազմակերպվել առցանց դասեր:

Սնունդը

Սովորողը ջուրը բերում է տնից /ջրի շիշը պահում է իր պայուսակում, կամ սեղանի, որպեսզի չխառնի մյուսների շշերի հետ/: Սնունդը կազմակերպվում է դպրոցում: Նախաճաշը բրդուճների տեսքով պատրաստվում է խոհանոցում, օրվա հերթապահները փակվող տուփով սնունդը տանում են դասարան կամ բացօթյա որևէ տեղ, և սովորողներն իրարից հեռու նստած նախաճաշում են՝ նախապես օճառով լվանալով ձեռքերը: Ճաշը կազմակերպվում է խոհանոցում: Սովորողները տնից բերում են մեկանգամյա օգտագործման ափսեներ, գդալներ կամ սննդի ճամփորդական տուփեր: Խոհանոցը  մշտապես օդափոխվում է, սեղաները դրված են իրարից հեռու՝ ներառելով նաև միջանցքը, սովորողների սնունդը լցվում է իրենց բերած ափսեների մեջ /սնունդը բաժանում է երկարացված օրվա կազմակերպիչը/: Հաց ուտելուց հետո յուրաքանչյուր սովորող իր ափսեն նետում է աղբամանը կամ տոպրակի մեջ տեղադրված տանում է տուն՝ լվանալու: Խահանոցում կարող են միաժամանակ սնվել 40-ից ոչ ավել սովոորղ:

13:35-ից ճամբարի կազմակերպում

Արտակարգ սեպտեմբերի 15-ից , կրթահամալիրի Արևմտյանդ պրոցում գործում են  հեղինակային կրթական ծրագրով որոշված ճամբարները /յուրաքանչյուր աշխատանքային օր՝ մինչև 17:00/։ Ճամբարները գործում են բացօթյա կամ մեծ սրահներում,  մոտակա այգիներում՝ պահպանելով անվտագության կանոնները։